السلام عليكم ورحمه الله وبركاته
اشكر اولا القائمين على المنتدى وادعى الله ان يجعله فى ميزان حسناتكم ان شاء الله
28 سنه الطول 170 والوزن 68 كج
من فتره 6 شهور جالى دوار فى نهايه اليوم بمعنى اول ما بحط راسى على الوساده بحس بدوار لمده ثوانى 5 او 6 ثوانى بالكتير ونفس الوضع وانا بقوم من النوم
رحت لدكتور قال ده التهاب فى الاذن وكتبلى بيتاسيرك واوكسيبرال مرتين صبح وليل والحمد لله راح الدوار بعد يومين
ونسيت الموضوع الى ان حصل مره اخرى من اسبوع بس اشد شويه ذهبت لدكتور اخر كشف على ودانى وعملى زى احتبار نظر وطلع كله تمام قالى ان ده نتيجه ان فيه كريستلات فى الاذن الداخليه بتتحرك من مكانها نتيجه صدمه فى الراس او لوحدها وموضوع كبير كده وخوفنى جامد وكتبلى على حاجتين منهم رسم اتزان المهم خوفنى جامد معملتهمش الصراحه وكتبلى برضه بيتا سيرك ودرامينكس
الموضوع تانى مره قعد حوالى اسبوع هو دلوقت الحمد لله راح
علما بان/ المرتين الضغط مظبوط جدا وباكل كويس والنشاط عادى جدا ولا يوجد تنميل فى الايدى او طنين او اى حاجه بمعنى ببقا زى القرد طول اليوم اجى احط راسى احس بدوار او لما ببص لفوق كمان بحس بدوار
من العادات بتاعتى (جايز يبقا يها علاقه )/بقعد ادام الكمبيوتر كتير لان شغلى مرتبط بيه وبنام من غير مخده او بمخده رفيعه كمان المرتين كان عدى البرد العادى اللى هو رشح وعطس كده يعنى
انا اسف طولت عليكم لكن عشان ابقا حاطط كل التفاصيل انا عاوز بس اعرف الموضوع ده انا مش عوزه باذن الله يجى تانى لان بيعملى اكتئاب فا اعمل ايه او اخد علاج ايه
بارك الله فيكم