السلام عليكم ورحمة الله وبركاته
انا تجربتى طويله شويه فاولا انا بشكر مجهودكم فى المنتدى وربنا يجعله فى ميزان حسناتكم
اولا أنا والده قيصرى من سنه وعشر شهور وحملت بعد تمن شهور من زواجى بس حصل اجهاض وكان هذا الحمل بعد اخذ منشط الكلوميد وبعد هذا الاجهاض جتنى العاده الشهريه ثم حدث الحمل فى الشهر العاشر من زواجى
انا بعد ما ولدت ولانى لم اكن ارضع طبيعى فكنت ااخذ حبوب جينيرا وكنت اعانى من زياده كبيره فى الوزن حيث ان طولى 167 وبلغ وزنى فى الحمل 107 اخذتها حوالى 9 شهور حيث انها تسببت فى قله ايام دورتى بشكل مبالغ فيه فايام دورتى الشهريه 7 ايام فكانوا يصلوا الى يومين او تلاته ولما سألت الدكتور قالى لازم توقفيه لانه ممكن يعمل ضعف للمبايض واركب شريط
وده اللى حصل وقفته وركبت شريط وبدأت لغبطه الدوره فبدأت الدوره اول شهر جت مظبوطه 28 يوم وتانى شهر اتأخرت جامد وبدأت ايامها تزيد بدل 7 ايام بقوا 15 يوم وكانت بتنزل فى الاول نقط بسيطه يومين تلاته وبعدين شديده 9 ايام وتقل يومين اوتلاته وما يفوتش اسبوعين وتيجى بنفس الطريقه بس انا فى الوقت ده عملت ريجيم ونزلت من 101 اللى كان وزنى ساعتها لحد 85 ك ومانزلتهمش مره واحده كان على 3 الى اربع شهور وثبت وزنى على كده ولما تعبت من الشريط شيلته بعد ما كنت ركبته 6 شهور وفضلت الدوره متلغبطه وبتتأخر بتعدى 36 يوم وانا شيلته كان شهر 9 2013 ورحت لدكتوره شهر 11 لان كانت الدوره بتيجى بألم شديد فى صدرى وكنت بحس كأنه متحجر فبعد الفحص طلبت منى تحاليل
كانت كلها كويسه ماعدا fsh كان 4.80
وlh كان 4.57
وقالتلى ان هرمون الحليب عندى عالى واديتنى علاج دوستينكس وبعدين اديتنى لاكتوديل
وعملتلى فحص اثناء التبويض وقالتلى ان حجم البويضه كويسه وديتنى حقنه تفجيريه
وقالتلى ادى نفسك فرصه شهرين ممكن يحصل حمل
وربنا قدر ومحصلش نصيب
ورحت للدكتور بتاعى وادانى فى شهر 1 اللى فات كلوميد وفوستامين وفى الشهر ده كنت تعبانه كان عندى التهاب فى العمود الفقرى واخدت ادويه كتير ومحصلش نصيب
وقررت انى هتوكل على الله وهسيب الموضوع كله كده ومش هتعب اعصابى بالتفكير فى اى حاجه ولما ربنا يريد ان شاء الله كله يتيسر
والدوره بعد علاج هرمون الحليب اتظبطت
بس فى شهر بتيجى مظبوطه وشهر تتأخر مره يومين ومره 6 ايام
انا زى ما قلت لحضرتك انى كبرت دماغى خالص وبصراحه ادويه المنشطات لما بخدها بحس انى متوتره وعصبيه واعصابى بتبقى مضغوطه بس المشكله ان جوزى قلقان وخايف يكون فى حاجه بحاول اقوله ان مفيش حاجه ان شاء الله وانا قررت اعمل ريجيم مره تانيه عشان انزل 15 ك كمان ان شاء الله

بس مش عارفه قلقه فى محله والا ايه؟؟؟
ارجو إنك تفيدنى واسفه لانى طولت عليك هو اللى قالقنى قلقه بس لكن انا لا بقيت بفكر فى ايام تبويض امتى تبدأ امتى تخلص امتى تيجى الدوره ناسيه كل ده لكن لما بتيجى بسجل على الموبايل

اقول لحضرتك على حاجه يمكن الناس اللى حوالينا سبب فى قلقه ساعات يقولوا ليه انتوا مستعجلين على ايه وابنكوا اهو ربنا يخليه وساعات تانيه يقولوا ليه شدوا حيلكوا بقى وهاتولوا اخ او اخت تناقض فظيع
اتمنى تطمنى وشكرا لحضرتك